TESTUINGURUA

Berueteko ostatupeko frontoiari buruz, hainbat informazio,  datu dibertigarri eta interesgarri jaso ditugu.

Orain dela urte asko, gaur egun Berueteko ostatua dena lehen araneko eta herriko kartzela izan zen, argazkian ikusten den bezala (frontoiaren herena estalirik zegoen zati hori aipatutako espetxea baitzen). Baina paretak bota zituztenetik frontoi bezala erabili ohi da gaur egun arte. Eraikina berriz ostatu bezala erabiltzen da.

Ostatupeko frontoi hau, herriko erdigunean, bihotzean dago. Bertara sartzeko aurretik herriko plaza zeharkatu behar delako, ondoan daukagun argazkian ikus daitekeen bezala.

Jaso dugun informazioari esker badakigu, frontoi honetan, ez direla jokatu txapelketa ofizialik. Baina, larunbata arratsaldeetan,  igandeetan meza ondoren eta bermuaren ostean, giro polita sortzen zen herriko plazan eta partidu ederrak jokatzen zituzten herrikoen artean. Jokatzen zuten jokamoldea, betidanik eta bakarra eskuz izan da. Buruz buruko  edo binakako partiduak jolasten zituzten. Frontoi honetan esku pilotara jokatzeaz gain, musika eta dantza ere jarri egiten zen, herriko festak urrian zirenean (euria zela eta). Orain ordea abuztuan direnez, oro har ez da arazorik egoten plazan musika jartzeko.

Gorago aipatu dudan bezala, gaur egun ere esku pilotara  jokatzen jarraitu egiten da, baina frontoi honen erabilgarritasuna jaitsi dela esan dezakegu.  Erabilgarritasun honen jaitsieraren eragina oro har, 2001-an  frontoi handi bat eraiki zutelako izan da Berueteko herrian. Jadanik, honek ez du esan nahi jokatzen ez denik. Ostatupeko frontoi honek bere xarma, zailtasuna duelako, oso dibertigarria egiten da bertan jokatzea. Guztiz desberdina delako bertan jokatzea frontoi berriaren aldean. Lehenik eta behin, espazioaren aldetik oso desberdinak direlako. Beraz ezin da berdin jokatu bi frontoietan. Modu batez esateko, frontoi txiki honetan, zentzumen guztiak ongi aktibatuak  egon behar dira, zakurkeriarekin, jokatu  behar da eta jokaldi ederrak egiteko aukera dagoelako, honek dibertigarriagoa izatea egiten du.

Guk dakigunez, oso apustu gutxi egin dira herrian (ikus elkarrizketak). Horietarik bat, elkarrizketan esaten dugun bezalaxe,  Joxe Migel Arrizabalaga eta Juan Mari Etxarriren artekoa izan zen 1981. urtean, Joxe Migelek bi behi eta Juan Marik lau ardi jokatu egin zituen, azkenean Juan Marirentzat izan zen erronka Bi partiduak juxtuan irabaziz.

Apustu honetaz gain, anekdota txiki bat ere ezagutzen dugu arkupe edo karrape honekin zerikusia duena. Honela kontatu zigun herriko mutil batek: Anekdota bat bai, gu asko ibiltzen gara Leitzan parrandan eta horrela, eta duela urte pare bat edo han kalean geundela Abel Barriolarekin juntatu ginen eta hitz egiten ari ginela gure koadrilako batek desafioa bota zion karrapen eta Barriolak onartu egin zuen. Bana bueno oraindik hor dago jokatu gabe, badakizu mozkor kontuk. Dakigunez, ez da inoiz pilotari profesional bat bertan jokatu. Beraz, aipatutako desafioa noizbait jokatzen bada, Abel Barriola izango da lehen pilotari profesionala bertan jokatzen duena.